Sunday, November 28, 2010

Angkat Dayak! Dani agi!!

Najib, Rosmah, Putera Albert ari Monaco, Putera Taib ari Sarawak, Puteri Rozie ari Sarawak, ti lalu dikelala mega enggau nama Datuk Raziah Mahmud-Geneid (iya nya menyadi indu Taib)

Peda meh ngena mata kita empu. Najib enggau Taib ba atas panggau lebuh maya pengerami Islamic Fashion di Monte Carlo, di menua Monaco, kena 10. 10. 2010. Peda meh pengamat utai tu.
1. Majlis Pembukaan Festival Fesyen Islam (IFF) Dan Jamuan Makan Malam Di Monaco Sporting Club Di Monte Carlo.

2. Monte Carlo Islamic Fashion Festival.

3. Two donations - a tale of disparities.

Jauh ari dipeda mata bala rakyat di Sarawak, tang bala ‘anak raja’ menua kitai tu nyamai bendar idup, lalu dikelala mensia di menua bukai. Bah! Sapa ti melanja pengerami enggau pejalai sida tu? Kita tentu deka nemu nama kebuah Najib rapat bendar kaul enggau Taib. Siti aja pengawa ti ulih dikena Taib numbangka perintah BN – iya semina bejaku lalu mekat semua menteri parlimen iya ari Sarawak tu, enda nyukung BN, lalu ngena chara nya aja meh, perintah Najib ulih runtuh. Mudah bendar, enda pia? Bah! Sapa orang ke pemadu bekuasa di menua kitai di Malaysia ditu? Taib, tauka Najib?

Aram! Tumbang ke Taib, lalu ari nya, BN tentu deka tumbang mega.

Tang kita enda ulih numbang ke Taib, laban iya siku mensia ti kelalu pintar. Taib udah betaun-taun ngena bansa Dayak. Iya udah magi lalu mechah ke bansa Dayak. Seagi-agi bansa Dayak enda ulih begempung, seagi-agi nya meh Taib bepeluang nyadi mensia ti pemadu bekuasa di menua Malaysia tu.

Nama agi chara dikena Taib? Majak meh iya mechah lalu magi bansa Dayak, ngachuk bansa Dayak begedi ke menua Malaya (anti-Malayanism). Muntang bendar. Chukup pintar.

Sekeda ari bansa Dayak udah kelalu arap ke runding “anti-Malaya”, laban sida tu enda nemu berunding ngena akal enggau panjai. Kitai raban bansa Dayak endang sebengkah bansa ti mudah bendar diperintah peneka ati. Suah kitai nyembur ke leka jaku dulu, sebedau kitai berunding. Lalu pengelemi tu meh ti dikena Taib ngenggam bansa Dayak. Kitai dibagi, lalu diperintah!

Bala “cyber-trooper” Taib, nengah internet endang seruran ngachuk bansa Dayak di Sarawak begedi ke Malaya, lalu mayuh bala kitai pechaya, tau ke arap ke penemu tu. Sekeda chunto raban “cyber-trooper” nya baka raban ba Facebook ti ngela diri Sejarah Sarawak, enggau bala orang ti numbuh ke blog Sebanaku Sarawak enggau Beraiku Sarawak. Raban ba Facebook nya enda bekereja ngiri runding begedi ke Malaya, lalu dua iti blog nya endang bekereja ngelindung Taib sereta ngiri penemu begedi ke Malaya. Raban Facebook nya digaga siku indu ke agi biak ari Wanita PBB, lalu dua iti blog nya diintu sereta dikemata ke sekeda ari bala Pemuda ba PBB. Bala orang tu endang dibayar PBB gaji. Ke terubah iya, sida tu ngaul kitai enggau jaku subuk, awak ke kitai begedi ke perintah BN. Tang lama-kelama sida iya lalu ngerachun runding kitai. Chara lama. Lalu bansa Dayak mudah bendar nerima semua macham utai ti didingan, ti dipeda, enggau ti dibacha. Bansa Dayak tau disema ke baka jelu kerebau ditusuk ba idup. Tu meh pengamat iya.

Nama kebuah kitai dibai begedi ke Malaya? Mudah bendar! Semua parti penyakal, tang enda nyengkaum SNAP, endang bepun ari menua Malaysia Timur, tau ke Malaya. Udah pemenchi ke Malaya beduduk ba runding kitai, kitai mega lalu begedi ke semua parti ke betumbuh ari menua Malaya. Pengawa berebut ke kuasa dalam parti lalu enda ulih putar. Enti kaban dalam parti penyakal ti charut enggau diri sama diri tau ngasuh parti nya lemi. TU meh utai ti dikedeka ke Taib.

Taib endang mengkang deka meda bansa Melayu enggau Dayak begedi ke sebarang pekara ti bekaul enggau Malaya, enggau mega UMNO. Tu, ngambi ke iya tau meruan merintah menua Sarawak. Seagi-agi kitai tu agi sepenemu enggau Taib, seagi-agi nya meh iya bekuasa, lalu nya meh utai ti dikedeka ke iya.

Baka ni ku penemu rindu ke Borneo (Borneonization)? Penemu nya pan sebaka enggau penemu begedi ke Malaya. Tu mega siti chara Taib bepagut ba penuduk iya. Aram meh kitai merening utai ti nyata, tau ke nyengenda ngelingi kitai. Menua Sarawak enda mudah mansut ke diri menua Malaysia. Kitai ti selalu bemimpi deka pansut ari Malaysia, pan tau mega nyadi nyata. Lalu kitai Dayak mega rindu bendar ke mimpi, tau ke nyuluk ati. Taib endang nemu utai tu. Nya meh kebuah bala pematau (spy) iya seruran ngiri bansa kitai tu enggau mimpi ti manah – Borneo merintah diri! Teju ke bala Dayak bemimpi. Tu endang chara Taib. Iya nupi kitai ngena ubat tinduk ke benama “Borneonization” enggau “anti-Malaya”, awak ke kitai terunda-runda sereta randa-rindang

Kitai Dayak mega ditemu rindu sereta deka bendar bejaku. Taib nemu pengelemi kitai tu. Tang peneka kitai ti betalat ke jaku enggau pangan diri, enda baka kitai ti deka ngereja utai ti dipetalat ke kitai. Siti tanya aku ditu: Ni bagi parti politik di Sarawak ti berani enggau terang-terang bejaku dalam manifesto sida pasal “Borneonization”, tau ke pengawa ti deka mai Sarawak merintah diri? Bisi?

NADAI. Nama kebuah? Laban, ba dunya nyata politik, penemu nuduk ke menua deka merintah diri endang ukai pilih ti mudah. Dani, bansa Dayak! Dani! Lua ke ubat tinduk ti suah udah disapi Taib suh nyawa kita nya. Umbas agi tinduk enggau bemimpi. Maya kita nyau tedani, tanya diri empu – “Ni bagi pilih aku?”

Pakatan Rakyat.

Nama alai PKR, PAS enggau DAP nya semua bepun di Malaya? Mudah amat nyara tu. Sarawak endang agi dalam Malaysia, lalu kitai enda tau enda dani lalu berati ke gaya politik sereta mega anang enggai bekereja sama. Tu utai ti enda tau enda diperati ke kitai: orang Sarawak enda tau enda ngetu ngelaban pangan diri, begempung dalam PR lalu numbang ke Taib. Tumpu ke runding enggau tinjau kitai nuju siti juluk ati. Umbas. Badu agi kitai makai ubat tinduk ti diberi Taib. Badu agi ngundi iya. Ngetu dulu kitai ngembuan runding pasal Borneo merintah diri, tau ke penemu “anti-Malaya”, tang beri meh sukung kitai ngagai semua parti PR ti bepun ari Malaya. Tumbang ke ulih kitai Taib nya. Udah nya baru kitai bejurai ke baka ni kitai nuju juluk ati ti deka meda Borneo magi diri ari Malaya.

Kena meh pengerindu kita ke internet berati ke pengawa politik menua kitai. Pengerindu kitai ti berandau ba Facebook nya siti chara iya, tang pengawa bepolitik nengah internet mega siti chara iya. Baka ni chara kitai nusui berita ti ayan ba blog, laman web, tau ke randau ba Facebook ngagai orang bukai ti nadai peluang ngena internet? Kala kita nyelak (print) berita-berita ari Sarawak Report, lalu nyadung, tau ke macha ba mua sida ti diau di menua pesisir din? Umbas nya bemimpi – dani! Tu meh maya kitai numbang ke Taib. Nadai guna mega enti kitai kerah-kerah berandau ba Facebook, tau ke ba blog kitai, enti kitai enda ngereja pengawa ba dunya nyata tu.

Ngagai semua kaban dalam Pakatan Rakyat Sarawak (PKR, SNAP, DAP enggau PAS) – diatu meh maya kita nya bekereja! Baka ni ko kita bulih sukung ari pengundi, enti kita enggai meri pengundi kita ati ti taluk sereta rindu ke kita?
1. Ibu Hafsah Harun, umbas meh nuan bepolitik. Ibun meh uchu-ichit nuan.
2. Aya’ Edwin Dundang, beri meh awak ke orang ti biak agi bepolitik.
3. Aya’ Jimmy Donald, pajak ke pengerindu nuan ba pengawa nulis bup.
Kami ti biak tu ukai enda bebasa ke Hafsah Harun, Edwin Dundang, tau ke Jimmy Donald, tang kami udah meda kita ngena peluang kita suba enggau manah bendar, lalu maya kita bepolitik pan patut tau ngetu diatu. Tu meh maya raban orang ti biak disabung kitai belaban. Uji peda kita menua Britain enggau America. Cameron baru beumur 44 taun, lalu Obama beumur 50 taun. Dua bengkah menua demokrasi ti pemadu besai nya diperintah dua iku tuai ti agi biak. Hafsah Harun, Edwin Dundang enggau Jimmy Donald ... kita tiga nya jauh tuai ari Cameron enggau Obama. Nyurut ke diri meh enggau ati lantang diatu. Lalu enti PR ulih mega perintah di menua kitai tu, aku bisi bendar pengarap kita tiga nya deka diberi tanda pangkat Datuk. (Tau ke Taib endang ngena kita tiga nya dikena ngachau pengawa PR di menua tu? Engka meh kini?)

Bah! Deka kita menang ba kayau ti mit, tang enda ulih menang kayau besai lalu megai perintah, tau ke, deka kita alah mimit-mimit, tang ulih menang kayau besai? Angkat! Dani agi!!


Read English version: WAKE UP DAYAKS!

No comments: